|
Dis gebruiklik om in
akademiese geskrifte soos werksopdragte,
verhandelinge, proefskrifte, navorsingsartikels en -verslae
'n oorsig te gee van die huidige stand van kennis
oor die onderwerp. Dit vorm die fondament van 'n
mens se eie navorsing en argumente en word vorentoe
by jou eie werk geïntegreer by wyse van
- aanhalings (wanneer
jy die presiese woorde van 'n ander weergee),
- parafrasering (iemand
anders se idees in jou eie woorde beskryf), of
- opsomming (slegs
die hoofgedagtes van 'n ander in jou eie woorde
beskryf).
Indien erkenning nie
op die regte manier gegee word nie dui dit daarop
dat
- jy nog nie bedrewe
is met verwysingstegniek nie - iets wat 'n mens
maklik kan aanleer met die hulp van dosente, of
- jy doelbewus maak
asof dit jou eie idees is en derhalwe
iemand probeer verkul - iets wat vinnig afgeleer moet
word want dis 'n misdryf.
In albei gevalle kan jy
beskuldig word van PLAGIAAT
met baie ernstige gevolge vir jou akademiese
loopbaan en selfs vir jou beroepsloopbaan.
Ons het hier 'n
pakkie inligting en goeie raad bymekaargesit om jou
te help om die probleem te verstaan en om te leer
hoe om dit te voorkom. Jou dosente sal dit ook van
tyd tot tyd in die klas bespreek en jou leer hoe om
op die regte manier na bestaande inligting te verwys.
Maar onthou op die ou end is jy self verantwoordelik
vir jou eie loopbaan. Moenie met jou toekoms dobbel
nie.
|