Verwysing is 'n gestandaardiseerde  manier om inligtingsbronne wat vir akademiese skryfwerk gebruik is, te identifiseer. Dit is ook die manier om "toestemming te kry" van die outeur om sy/haar idees te gebruik deur hom/haar te erken as die eienaar daarvan.

Dit word gedoen deur die bron in die teks te vermeld wanneer jy iemand se woorde  aanhaal, parafraseer of opsom, of wanneer jy hulle idees gebruik wat in ander formate en media, soos grafika, voorkom. Aan die einde van jou werk maak die bron dan weer deel uit van die bronnelys of bibliografie.

Daar bestaan verskillende verwysingstelsels elk met hulle eie styl en reëls. Harvard, Vancouver, APA en Footnotes is vier bekende stelsels wat deur verskillende fakulteite en departmente op die UP kampus gebruik word. Maak seker by jou dosente watter styl vereis word ten opsigte van elke kursus en volg die reëls van daardie styl noulettend.

Omvattende inligting oor die verskillende stelsels en hulle reëls is beskikbaar by  http://upetd.up.ac.za/authors/create/literature.htm

Dit lyk asof almal tans sukkel om korrek na webbronne te verwys. 'n Opsomming van die reëls wat betrekking het op webbronne is te vinde by  http://upetd.up.ac.za/authors/create/plagiarism/electronicsources.pdf

• Korrekte verwysing toon dat jy gepaste inligtingsbronne geraadpleeg het en dat jy bekend is met ontwikkelinge oor en kenners van die spesifieke onderwerp.
• Korrekte verwysing illustreer dat jou eie idees verband hou met dié van die kenners en dit verleen gewig aan jou argumente.
• Korrekte verwysing maak dit maklik vir die lesers van jou werkstuk/verhandeling om die bronne op te spoor wanneer hulle gegewens wil verifieer of meer daaroor wil lees.
• Korrekte verwysing is noodsaaklik om plagiaat te vermy.

Referencing and avoiding plagiarism, wat ontwikkel is deur die University of South Australia se Learning Connection, gee 'n goeie oorsig oor verwysing, aanhaling, parafrasering, verwysingslyste en bibliografieë en het 'n uitstekende vraag-en-antwoord blad.