Bewusmaking 

• Praat gereeld oor plagiaat - ten minste aan die begin van elke termyn.
• Maak seker dat u studente die vernaamste begrippe van plagiaat, intellektuele eiendom en kopiereg verstaan.
• Maak studente bewus van die UP, fakulteits- en departementele beleid, reëls en regulasies. Verduidelik die verband tussen die definisie van plagiaat en die beleid en regulasies.
• Waarsku studente oor die erns van die saak en die gevolge wat dit vir hulle studie- en professionele loopbane mag inhou. Moenie onduidelik wees oor die soort straf wat kan volg nie.
• Maak hulle bewus van alle beskikbare hulp.
• Plaas kopiereg en plagiaat waarskuwings voor in alle studiegidse.
• Sluit 'n anti-plagiaat skyfie in by elke Powerpoint aanbieding vir klasdoeleindes.

Opvoeding

• Tree self op soos 'n positiewe rolmodel: sorg dat u korrek na alle bronne in studiegidse verwys.
• Bespreek plagiaatvoorkoming in terme van UP waardes: 1) Plagiaat is diefstal van woorde en idees en dit word gewoon nie deur 'n ordentlike mens gedoen nie; 2) Plagiaat bederf vertroue en akademiese integriteit.
• Bespreek plagiaatvoorkoming in terme van intellektuele eiendom, redelike gebruik van bronne en die rol wat verwysing speel in wetenskapskommunikasie.
• Verduidelik die redes vir verwysing.
• Bespreek die voordele van korrekte verwysing: dit toon dat 'n mens oor die onderwerp gelees het, dit verbind jou mening met die van kenners en dit help die leser om die bronne maklik op te spoor.
• Leer hulle die vaardighede van akademiese skrywery, veral aanhaling, parafrasering, opsomming en verwysing. Maak seker dat hulle dit konsekwent toepas. Goeie voorbeelde is beskikbaar by  http://www.english.vt.edu/~IDLE/plagiarism/plagiarism3.html
• Webplagiaat is tans 'n besonder groot probleem: maak seker dat u self weet hoe om na webbronne te verwys en leer u studente die regte styl. 
• Beklemtoon die nodigheid vir oorspronklike, kritiese denke.
• Maak seker u studente is inligtinggeletterd. Kontak u inligtingkundige vir hulp in die verband.

Voorkoming

• Heroorweeg die ontwerp en evaluering van u werkopdragte:

1. wat wil u eintlik evalueer? 
2. maak seker dat almal die opdrag verstaan
3. maak dit relevant vir toekomstige navorsing of werk 
4. integreer die verskillende elemente van assessering 
5. oppas vir breë, algemene onderwerpe
6. indien moontlik, gebruik baie resente onderwerpe
7. verander onderwerpe gereeld
8. wees spesifiek oor u verwagtinge: lengte, tipe bronne om te raadpleeg, resentheid, styl, omvang
9. verskaf voorbeelde en 'n standaard vir verwysing
10. wees spesifiek oor samewerking
11. gee genoeg tyd
12. kontroleer bronne so ver moontlik
13. indien moontlik, sluit verplige leeswerk van enkele bronne in by alle opdragte

• Dring daarop aan dat elke werkstuk 'n verklaring van akademiese integriteit bevat. Die volgende is 'n moontlikheid [afdrukbare weergawe]:

1. Ek verstaan wat plagiaat is en ook wat die Universiteit se beleid in die verband is.

2. Die werkstuk/verslag/verhandeling/proefskrif/...... is my eie werk.

3. In alle gevalle waar ander mense se werk gebruik is (uit gedrukte bronne, van die Internet of enige ander bron), is dit sorgvuldig erken en daarna verwys in ooreenstemming met die vereistes van die departement.

4. Die werkstuk is nooit voorheen deur 'n ander student ingehandig nie.

5. Ek sal nie toelaat dat enigiemand anders my werk kopieer met die doel om dit aan te bied as sy/haar werk nie.

Handtekening________________________

• Tree redelik maar konsekwent op binne die UP regulasies wanneer plagiaat voorkom.
• Kom op hoogte met die "essay banks" en "paper mills" verskynsel. 'n Oorsig is beskikbaar by http://online.northumbria.ac.uk/faculties/art/information_studies/Imri/JISCPAS/ site/res_essay.asp)
• Maak dit duidelik vir u studente dat u op hoogte is met plagiaat en dat daar meganismes is om dit op te spoor.
• Gebruik elektroniese hulpmiddele.
• Moet u nie blind hou vir plagiaat omdat dit pynlik en tydrowend is om dit te hanteer nie. Die langtermyn gevolge is soveel erger.