Die moenies

• Moenie agter onkunde skuil nie. 'n Kriminele oortreding is strafbaar, ongeag of dit wetend of onwetend gedoen is.

• Moenie doelbewus plagiaat pleeg nie (bv wanneer jy gedruk is vir tyd). Dit kan die einde van jou akademiese loopbaan beteken.

• Moenie uit elektroniese bronne soos webblaaie knip en plak nie.

• Moenie ou werkopdragte van ander studente gebruik nie - selfs nie met hulle toestemming nie.

Die moets

• Leer om onafhanklik en krities te dink. Lees wat ander oor 'n onderwerp te sê gehad het en formuleer dit dan in jou eie woorde met vermelding van die bron.

• Beplan jou werkopdragte goed en maak genoeg tyd vir leeswerk, vir opskryf en om die werkstuk te hersien voordat jy dit inhandig.

• Maak seker dat jy die dosent se verwagtinge verstaan, veral ten opsigte van inhandigingdatums, skryfstyl, samewerking met ander studente, verwysingstyl, bronnelyste en bibliografieë.

• Indien jy twyfel oor enigiets, VRA! Jou dosent of 'n tutor kan goeie advies gee.

• Neem sorgvuldig notas.

• Sodra jy met jou leeswerk begin, moet jy 'n behoorlike lys van verwysings saamstel in die verwysingstyl wat gepas is vir die vakgebied.

• Leer om korrek aan te haal, te parafraseer en op te som. Riglyne en voorbeelde is beskikbaar by http://www.english.vt.edu/~IDLE/plagiarism/plagiarism3.html 

• Leer om 'n verwysingspakket soos Reference Manager te gebruik.

• Gebruik altyd die korrekte verwysingstyl wat voorgeskryf is vir die bepaalde kursus. Indien jy twyfel, vra jou dosent watter styl jy moet gebruik. Dit behels onder andere die volgende:

Wanneer jy die presiese woorde van 'n ander persoon aanhaal:

• Plaas die aanhaling in aanhalingstekens ("  ") indien dit deel uitmaak van 'n paragraaf wat jy geskryf het.

• Spring die aanhaling in van die linker kantlyn, of gebruik 'n ander/kleiner font wanneer die aanhaling alleen 'n nuwe paragraaf uitmaak.  

• Erken die bron volgens die styl wat voorgeskryf word vir die departement of vakgebied.

Wanneer jy gebruik maak van ander se idees maar verkies om dit in jou eie woorde te stel:

• Verander die formulering en gebruik woorde wat by jou eie skryfstyl inpas, of vertaal die aanhaling in die taal waarin jy skryf, MAAR

• Maak seker dat jy nie die outeur se woorde verdraai om jou eie opinie te pas nie.

• Erken die bron volgens die styl wat voorgeskryf word vir die departement of vakgebied.